Tonga i Riana Andriamandavy: Aiza ny fandraisana andraikitra ny zandary?

• Imprimer

Omaly tolakandro no fantatra fa tafaverina eto an-tanindrazana ny senatera Riana Andriamandavy VII rehefa nandeha nivahiny tany Sina, nandritra ny 5 andro. Tsiahivina ihany fa ny alahady 7 mey teo izy no nandao an’i Madagasikara ary hatreto dia mbola tsy fantatra mazava ny tena anton-diany tany amin’io firenena io. Ny Antenimierandoholona anefa ao anatin’ny fivoriana ara-potoana tanteraka nanomboka ny talata 2 mey lasa teo. Raha ny fantatra ihany dia sidin’ny kaompania Air Madagascar niainga tany Guangzhou, Sina, ary nandalo tany Bangkok, Thailand, no nandehanan’ity loholona HVM ity. Amin’izao fahatongavan’i Riana Andriamandavy eto an-tanindrazana izao dia andrasana amin’izay ny fandraisana andraikitra avy amin’ny zandary satria raha ny fanazavana nomen’ny tonian’ny fampanoavana ambony omaly, Jacques Randrianasolo, dia efa voarain’ny sampana fikarohana eo anivon’ny zandarimariam-pirenena ny didy fampiantsoana ity loholona akaiky sy mpiaro fatratra an’i Claudine Razaimamonjy ity, ny alarobia 3 mey lasa teo, ora vitsy tao aorian’ny nametrahan’ny filohan’ny SMM ny fitoriana teo anivon’ny fitsarana. Marihana fa adidin’ny zandary no manatanteraka an’io didy navoakan’ny fampanoavana io raha toa ka tena tany tan-dalàna marina ity firenena ity. Azon’ny zandary tanterahana tsara izany satria tsy misitraka ilay zo manokana tsy ahafahana misambotra azy intsony na ny “immunité parlementaire” intsony i Riana Andriamandavy VII ao anatin’ity raharaha ity. Ny antony dia efa nohazavain’ny tonian’ny fampanoavana ambony omaly, fahatratrarana ambodiomby (flagrant délit) ny heloka nataony ka miala ho azy io “immunité parlementaire” io araka ny voalazan’ny lalàna velona sy manan-kery eto amin’ny firenena. Tsy misy intsony moa ny antony tsy hitondran’ny zandary an’ity loholona ity eny amin’ny fitsarana mba ahafahana manao famotorona azy. Ny filohan’ny Antenimieran-doholona, ny profesora Honoré Rakotomanana, dia efa nanambara nandritra ny lanonana fanokafana ny fivoriana fa ny fitsarana irery ihany no mandinika sy mandray ny andraikiny raha toa ka misy ny fitoriana ny senatera Riana Andriamandavy VII. Efa ny fitsarana izao no mamoaka ny didy fampiantsoana ka adidin’ny mpitandro filaminana no manatanteraka izany, tahaka ny nataony rehefa nisambotra an’i Claudine Razaimamonjy, teny amin’ny lapan’ny kolontsaina sy ny fanatanjahan-tena Mahamasina.    

F.Tsihiavonana

•   Précédent
• Suivant